soweli Lesi li lon e utala pi kama sona: ijo li pali e toki musi kepeken toki open kepeken suno luka wan kepeken kule musi ona. ni li toki mi.
~~~
jan poka tu li lon poka nasin. jan wan li suli, jan ante li lili. ona tu li lon ma ni tan ni: tomo sona li lon tenpo lape. tenpo pini la, ona li kama suli lon ma ni. ona li wile kama sin tawa musi.
suno li wawa. ona li alasa awen lon pimeja. jan suli li sitelen lon lipu.
jan lili li esun wawa e kon li toki e ni: "mi pilin musi alaaaaa"
"tan seme a?" li toki pi jan suli.
"mi sona alaaaa"
"a! mi sona weka e pilin ni! tenpo poka la, esun suwi sin li kama tawa ma ni. ona li kule mute a!"
jan lili kama pilin pona lili. "suwi li pona tawa mi... taso, suwi seme li lon?"
jan suli li toki. "mi sona ala. mi tu o tawa esun ni tawa sona." ona li pana e uta pi pilin pona.
jan tu li pini e lape ona li kama tawa noka tawa esun suwi. jan lili li pilin ike lili.
"a.. suno li wawaaaaa... mi wile e ni: esun li kepeken ilo pi kon lete a!"
jan suli li toki wawa e ni: "mi pilin sama. taso mi pilin e ni: esun li poka mute a!"
"tan seme la sina pilin e ni?"
"tan ni!"
jan suli li luka tawa tomo. selo pi tomo ni li laso li loje. sitelen suli li lon lupa ona. ona li toki e ni:
"esun pi lete suwi" "ko suwi pi kule mute li lon!" "ona li kama open lon tenpo ni"
"wawaaaaaa!" jan lili li toki e ni kepeken kalama suli. "taso ken la mi ken ala moku e suwi ona tan ni... mi ken ala moku e telo walo soweli."
"ni la mi tu o awen tawa insa. ken la ona li esun e suwi ante anu seme?"
"sona a. mi tu o insa."
jan li tawa tan poka nasin tawa poka ante. ona li kama tawa lupa pi tomo esun li tawa insa. ona tu li tawa e lupa la, ilo lili li kalama suwi.
jan mani li lukin li toki e ni: "toki! suno pona tawa sina! sina wile e suwi seme a?"
jan suli li pilin pona. "toki a! mi wile e ko pimeja ni. namako la, mi wile e kili kiwen ni. mi wile e sike wan taso."
"pona a! sina wile e ni lon poki pan anu poki lipu anu seme?"
"mi wile e poki pan. jan lili o, sina wile seme?"
jan lili li kepeken kalama lili. "nnnn mi sona ala. mi sona ala e ni: telo soweli li lon ala ko seme?"
"tomo ni li esun e ko kili! ona la, telo soweli li lon ala." jan mani li luka tawa poki suli.
"kili mute ala li pona tawa mi...kule seme li lon?"
"kule pi kili pi loje jelo, en kule pi kili jelo suwi, en kule pi kili pi laso loje... kule mute li lon a!"
"mi la, kili pi loje jelo li pona ala... kili jelo suwi li nasa lili...mi sona ala e kili pini." jan lili li toki e ni tawa jan suli taso.
lukin pi jan suli li kama suno. "mi sona a! mi lili la, mama mi li pali e moku suwi kepeken kili ma ni. ona li pona mute a!"
"mi awen sona ala... taso mi alasa moku e ona tan sina."
"pona a!"
jan mani li telo e supa moku. "ni la, sina wile e ko pi kili pi laso loje anu seme?"
jan lili li awen lon tenpo lili. pini la, ona li pilin wawa. ".....wile."
"sina wile ala wile e namako?"
"ala, kin la, mi wile e ko lon poki lipu."
"pona a! ijo ni li wile e sike mani luka tu."
jan suli li wawa tawa pilin ona. "mi ken pana e mani."
jan suli li pana e mani la, jan mani li kama pana e ona lon poki mani li kama pali e ko suwi. open la, ona li jo e ilo moku sike li pana e ko pimeja lon poki pan. ona li namako e ona kepeken kili kiwen lili. pini la, ona li jo e ilo moku sin li pana e ko pi kili pi laso loje lon poki lipu. ona li jo e ona tu li pana e ona lon supa.
"suwi li lon a! o tawa pona a!"
"o awen pona a!" jan suli li tawa e luka ona.
jan tu li tawa. ona li kama tawa supa lape lon ma kasi.
"ni li tenpo lon... kili pi laso loje li pona ala pona tawa mi?" jan lili li toki e ni kepeken pilin awen.
"o moku pona a!"
jan lili li jo e ilo moku. ona li pana e ona lon ko li sewi e ona. ona li uta lili lon lipu ilo.
"a... ni li pona mute a! jan suli o, sina toki lon a! mi pilin pona mute a."
"mi pilin pona mute tan pilin pona sina, aaa!"
jan tu li moku e lete suwi ona, li pilin musi. suno ni li pona tawa ona.